Bitcoinin bahalaşması və gündəmdə olması səbəbi ilə, eləcə də, mənə ünvanlanan çoxlu suallara görə bu barədə paylaşım etmək istəyirəm.

Kriptovalyuta əməliyyatlarından gəlir əldə edən fiziki şəxslər Vergi Məcəlləsinin 101.2-ci maddəsinə uyğun olaraq 14 faiz dərəcə ilə gəlir vergisi ödəməlidir.

Bu gəlir, fiziki şəxsin qeyri-sahibkarlıqdan gəliri sayılır.

Belə ki, Vergilər Məcəlləsinin 99.3.8-ci maddəsinə əsasən, vergi ödəyicisinin aktivlərinin ilkin qiymətinin artdığını göstərən hər hansı digər gəlir (təqdim olunduğu təqdirdə) onun qeyri-sahibkarlıq fəaliyyətindən əldə olunan gəliri hesab olunur.

Buna əsasən vergiyə cəlb olunan gəlir kimi kriptovalyutanın alındığı vaxtla təqdim edildiyi tarixə olan qiymət artımı əsas götürülür.

Misal olaraq, Fiziki şəxs 2023-cü il mart ayında dəyəri 4 000 dollar olan kriptovalyuta alıb və həmin kriptovalyutanı 2024-cü il noyabr ayında 14 000 dollara satıb.
Bu halda fiziki şəxs 10 000 dollar (14 000-4 000=10 000) qeyri-sahibkarlıqdan gəlir əldə etmiş sayılır və Vergilər Məcəlləsinin 101.2-ci maddəsinə uyğun olaraq 14 faiz dərəcə ilə gəlir vergisi hesablayaraq dövlət büdcəsinə ödəməlidir.

Növbəti ilin mart ayının 31-dən gec olmayaraq “Gəlir vergisinin bəyannaməsi” ni vergi orqanına təqdim etməlidir.